Канон пророку Илие

Канон пророку Илие

Празднование 2 августа

Канон, глас 2.

Память святого славного пророка Илии Фезвитянина совершается 2 августа (20 июля ст. ст.). В христианстве является самым почитаемым ветхозаветным святым. Пророку Илие молятся о даровании дождя во время засухи.

Тропарь, глас 4-й

Иже во плоти Ангел, и пророком степень, вторыи предотеча пришествия Христова, Илия славныи, свыше послав Елисеови благодать, недуги отгоняти, и прокаженныя очищати, и всем его чтущим точит цельбы. (2 раза).

Слава, и ныне. Богородичен. Иже от века утаенное, и Ангелом несведомое таинство, Тобою Богородице земным явися Бог в неразмесне снятии воплощаемь. И Крест волею нас ради восприим, им же воскресив первозданнаго, и спасе от смерти душа наша.

Песнь 1. Ирмос

Поем Господеви, в мори древле люди наставльшему, и в нем фараона с вои потопльшу, песнь победную, яко прославися.

Запев: Святыи славныи пророче Илие, моли Бога о нас (поклон).

Видети желающии, Илии чудес огнедохновенную силу, огнезрачнаго и честнаго языка, духа крепость, по достоянию собрахомся.

Запев. Устне богоносе, и недоуменнаго языка, тесноту же и худогласие, действом иже в тебе Духа отверзи, и уясни к пению чудес твоих.

Слава. Даеши яже паче естества, повинувшимся слове, честным ти повелением, и покаряеши дождю двери Духом утвержаемо слово содевая.

И ныне. Богородичен. Поем Господеви, иже от Девы рожденному, и мира обновльшему, и Тоя ради нам жизнь божественую даровавшему, песнь победную, яко прославися.

Катавасия: Избави от бед рабы своя, святыи славныи пророче Илие, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (3 раза с поклонами).

Песнь 3. Ирмос

На камени мя веры утверди, разшири уста моя на враги моя, возвеселибося дух мой воспевати, несть свята яко же Бог наш, и несть праведна паче Тебе Господи.

Запев. Яко изряден пророче кормитель, иже враном творя тебе гощение, Единыя насыщаяи всяко животно благоволения, Ему же вси зовем, Ты еси Бог наш, и несть свята паче Тебе Господи.

Запев. Благодать Благодателю и Строителю, иже вдовицу и пророка напитавшему, неизреченным промышлением, Ему же вси зовем, Ты еси Бог наш, и несть свята паче Тебе Господи.

Слава. Затворивыи тученосныя облаки одождити, пищи лишаеме Сареффе, останок брашна, непрестанно росити сотвори, ты же взываше, несть свята паче Тебе Господи.

И ныне. Богородичен. Ты Едина паче всех иже от века, великим сподобися и паче естества, Бога бо невместимаго всей твари, во чреве прияла еси, и воплотила еси, тем же Богородицу Тя вси почитаем.

Катавасия.

Седален, глас 8-й.

Источника чудес, пророком удобрение, вси песненно вернии восхвалим, фезвитянина Илию: с плотию бо еще сыи беземертен, яко мертв уверяет мертвых восстание. Тем же дерзновение к Богу имея, подавает исцеления верою просящим, и молится Христови прилежно, согрешением оставление подати, празднующим любовию святую память его.

Слава, и ныне. Богородичен. В напасти многоплетенныя впад, от враг видимых и невидимых, молвою содержим есмь, безмерных согрешении моих, и яко к теплому заступлению, и покрову Чистая, к пристанищу притекаю Твоея благости. Тем же Пресвятая, из Тебе Воплощеннаго без семене моли, о всех рабех Твоих, непрестанно поющих Тя, Богородице всечистая, молящи Того прилежно согрешением оставление даровати, поклоняющимся верою рожеству Твоему. (Поклон).

Песнь 4. Ирмос

Услышах Господи слух Твоего смотрения, и прославих Тя Едине Человеколюбче.

Запев. Коренесекатель убо явился еси злобе, мудре пророче, добродетели же насадитель, темже тя ублажаем.

Запев. Укоряше тя словесы вдовица, пищею смерти пророче, отрока востание уверяющи.

Запев. Назнаменова славу тройческую яве, дуновением тричисленым, матери детища жива дарова.

Слава. Коль разжжеся, паля божественым огнем, и ревностию о, пророче, царя обличая творяща беззакония.

И ныне. Богородичен. Молим Тя Чистая, яже Бога без семене заченшую, присно молитися за рабы Твоя.

Катавасия.

Песнь 5. Ирмос

Света Подателю, и веком Творче Господи, во свете Твоих повелении настави нас, разве бо Тебе иного бога не знаем.

Запев. Закон отеческии тя, яко молитвеника всеистинна показа, чудодейственика, обращающа естества составом Илие, и преподобну жертву попаляюща водами.

Запев. Посрамил еси изрядно, яко истине служителю преподобне, сквернаго студа пророки, всеблаженне Илие, яве начертав тройческую силу.

Слава. Словом благодати священствуя Илие, заклал еси священники негодованныя, неповинныма си рукама, якоже огнем ревностию опаляемь.

И ныне. Богородичен. Тебе рождьшей Христа всему Содетеля, взываем, радуися Чистая, радуися яже Свет возсиявшая нам, радуися вмещшая Бога невместимаго.

Катавасия.

Песнь 6. Ирмос

Бездна грехов обыде мя последняя: но якоже пророка Иону, Господи, Господи возведи от тли живот мой.

Запев. Столп благочестия и жития чистаго, садитель чистоте был еси, Ангелом же подобник, чудныи Илие богоносне.

Запев. Гнев тя пророкоубиицы жены устрашив, иже вязати и решати приимша, дождем течение, чудныи Илие отгонит.

Слава. Возвысил еси колени преклонив, ума превознесеное око, мольбою изрядною решение творя, и бразды земленыя упоил еси тучами.

И ныне. Богородичен. Купина Тя в Синаи, не опально приближьшися огню, преднаписует Матерь присно Девую, всепетая богородице Марие.

Катавасия.

Слава, и ныне.

Кондак, глас 2-й.

Пророче и провидче великих дел Бога нашего, Илие великоимените, иже вещанием своим уставивыи водоточныя облаки, моли о нас Единаго Человеколюбца.

Икос.

Многое человеком беззаконие, Божие же многое человеколюбие, зря пророк смущашеся, Илия яряся, и словеса немилостивна, к Милостивному подвиже: прогневайся возопив, на отмещущияся Тебе ныне, Судие Праведныи. Но утробу Благаго никакоже подвиже, еже мучити Того отметающихся, присно бо покаяния всех ждет, Единыи Человеколюбец.

Песнь 7. Ирмос

Купина в горе огнем палящи, и обросима пещь халдейская, яве прописа Тя Богоневестная: божественыи бо безплотныи в плотне чреве огнь неопально прият. Тем из Тебе Рождьшагося поем, благословен Бог отец наших.

Запев. Преславно божественою ты воображеною силою облекся, пищею четыредесятодневною, Илие чудныи, долгии шествовал еси путь. Тем же в Хориве глаголаше, благословен Бог отец наших.

Запев. Хлад кроток показа и тонок, Господа тебе Илие, по Бозе ревнующу вседержители: ни дух бурен, ни трус, ни огнь страшаи. Темже Исусу кроткому пояше, благословен Бог отец наших.

Слава. Богоявления сподобися и пророчества, якоже великии Моисей пророки помазуя Духом, и царя Илие чудныи, и славы на Фаворе Христовы зритель быв, пояше, благословен Бог отец наших.

И ныне. Богородичен. Раждаеши без семене Безначальнаго и Превечнаго Господа, Отча Сына, мудрость же и силу, на последок Пречистая, паче естества плотию, на обновление земленых. Темже из Тебе Рождьшемуся зовем, благословен Бог отец наших.

Катавасия.

Песнь 8. Ирмос

Устрашися отрок благочестивых, всекрасныя души несквернено тело, и прииде в воспитан в велицей вещи, не деланен огнь присноживущии. Им же увядшу пламени, вечнующее пение воспевашеся, Господа вся дела пойте, и превозносите Его во веки.

Запев. Изрядно обрете Ахаав рода благолепие, всегубительство пророка обличением, сквернаго убийства мерзско мучение. Фезвитянин же, от огнедохновенна ума, Жизнодателю песнь воспеваше: Господа вся дела пойте, и превозносите Его во веки.

Запев. Дождит тебе огнь с небесе, попаляя, Илие одержимых пятьдесяте сугубо, яко Божию изрядну служителю. Держащему же присноживотную жизнь, боголепно песнь взываше, Господа вся дела пойте, и превозносите Его во веки.

Слава. Таинника тя показа Христос, яко чистоте садителя, иже девства пребожественое прозябение, на Фаворе божественаго воплощения, Божества непостижимыи свет, во Своей плоти показав тебе зовущу, Господа вся дела пойте, и превозносите Его во веки.

И ныне. Богородичен. Всебогатна бысть утроба Божия Матере, яко приемши Слово дебельством плоти, от нея смешена земленаго зрака по составу, явися град Божии, в нем же Вышнии жити благоизволи. Ему же поем, Господа вся дела пойте, и превозносите Его во веки.

Катавасия.

Песнь 9. Ирмос

Яже прежде солнца светильника Бога возсиявша, плотию к нам пришедша, из боку Девичу неизреченно вочеловечьшася, Благословеная Чистая, Тя Богородице величаем.

Запев с поклоном. Нетренное человеки шествие, на земли пожив, милотию струю Иорданскую, фезвитянин прешед, оружник воздушныи, неботечное соверши странное шествие духом.

Запев. Благочестия ревностию, фезвитянин опаляемь, на огнезрачней колеснице взимается: милоть же совлек ею же утаитися не возможе, Елисеови одеявшуся, приемлет божественую благодать.

Слава. Ужасеся Боговидец фезвитянин, с Моисеом зрит, яже око не виде, и ухо не слыша, и на сердце человек земленородных не взыде, воплощена Господа, на Фаворе Вседержителя.

И ныне. Богородичен. Юже немилостивнаго древняго погубления осуждение, и праматере исправление, юже роду к Богу вину присвоения, юже к Зиждителю мост, Тя Богородице величаем.

Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе Сыне Божии, молитв ради пречистыя Твоея Матере, и святаго и славнаго пророка Илии, и всех святых, помилуй и спаси нас, яко Благ и Человеколюбец. Аминь.