Канон честному и животворящему Кресту Господню

Канон, глас 4-й

Песнь 1. Ирмос

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся тоя чудеса.

Запев. Слава Господи Кресту Твоему Честному (поклон).

Кресте всесильне, апостолом похвала, преподобным утвержение, и верным знамение, иерархом и мучеником слава, победа и утвержение всем хвалящим Тя.

Запев. Кресте Всечестныи, четвероконечная сила, апостолом благолепие, и мучеником крепость, немощным здравие показася, мертвым воскресение, падающим воздвижение.

Слава. Кресте Ты ми сила буди, крепость и держава, избавитель и предратник на борющыя мя, щит и хранитель, победа и утвержение мое, присно соблюдающи мя и покрывающи.

И ныне. Богородичен. На Кресте Всенепорочная Своего Сына яко узре, оружие скорбное утробу Твою растерза, и восклицала еси рыдающи в болезни, но абие прославила еси Креста силу.

Катавасия. Сохрани от бед рабы Своя, силою Честнаго Креста Твоего Милостиве, яко усердно к Тебе прибегаем к милостивому Избавителю и всех Владыце Господу Исусу (поклон). Господи помилуй (3 раза с поклонами).

Песнь 3. Ирмос

Твоя певцы Богородице, живыи нетления источниче, лик Себе совокупльши духовен утверди. И в божественей Ти славе, венцем славы сподоби.

Запев. Кресте преподобным оружие, обоюдныи мечь Христов, верным удобрение, болящим исцеление и заступление, и воздвижение умершим всечестне.

Запев. Кресте основание благочестия, бесом показася губитель, и Церквам благолепие, нечестивым погибель, врагом посрамление в день Судныи.

Слава. Кресте Живоносныи, Ты ми буди крепость, и победа и щит и стена нератуема, бесом отгнание, и помыслом погашение, и ума моего сохранение.

И ныне. Богородичен. Распятие поносное Дево Владычице, Твой Сын претерпел есть, и смерть неподобную, но вознесеся, низверже противныя вражия силы, яко безсмертен. Катавасия.

Слава, И ныне.

Седален, глас 8-й.

Проначерташе тайно древле временем, Исус Наввин Креста образ, яко же руце простре крестообразно Спасе мой, и ста солнечное течение, дондеже враги погуби, противящыяся Тебе Богу. Тем же зайде на Кресте Тя зря, и доле державу смерти разорив, и ада связал еси.

Слава, и ныне, той же.

Песнь 4. Ирмос

Седяи во славе на Престоле божествене, на облаце легце, прииде Исус пребожественыи, от пречистыя Девы, и спасе вопиющыя, слава Христе силе Твоей.

Запев. Четвероконечныи сыи мир, и яко триобоюдныи мечь, начала тме сечеши, нами воображаемь, Кресте оружие великое Христово, и непобедимое победительство всесильное.

Запев. Твоя высота живоносне Кресте, воздушнаго князя биет, и глубина всея бездны закалает змия, широту паки воображает, низлагая мирскаго князя, крепостию Твоею.

Слава. Вознесеся сопривлекл еси падшыяся, воздвигл еси естество земное, Престолу Божию спрославился еси, Кресте высото великая, мирскии мосте, душу мою от страстей глубины вознеси вскоре.

И ныне. Богородичен. Крестообразно пречистая Отроковице Богородице, длани Свои распростерши, ко иже на Кресте воздвиженому, и молитвы Дево ныне принеси, за всех верно молящихся Тебе. Катавасия.

Песнь 5. Ирмос

Удивишася всяческая, о божественей славе Твоей, Ты бо браконеискусимая Девице, прият во утробе надо всеми сущаго Бога, и родила еси безлетнаго Сына, всем воспевающим Тя мир подавающа.

Запев. Кресте, небесная лествице святыни, степенем наставниче, Христова высота и слава еси, Божии образ назнаменателен миру, невидимому же и видимому единочестне.

Запев. Кресте, образе не исписанныи силою, освящение водам, очищение воздуху, освящение и просвещение всякому, мужества знамение, и Христов скипетр непреложныи, противныя в землю попирая.

Слава. Кресте всесильне, злочестивыя низложи враги, ненавидящыя и хулящыя Тя безумно, языки попали, и угаси шатания их. О, Кресте Всесвятыи и Христоносныи, сохрани нас державою Своею.

И ныне. Богородичен. Всех Царице Владычице, скипетром рожества Твоего, разруши Девице востание, хулящих крестную силу. Даждь крепость и очищение, победу и помощь верным Твоим. Катавасия.

Песнь 6. Ирмос

Божественое се и всечестное совершающе празднество, богомудрении Божия Матере, приидите руками восплещем, от Нея рождьшагося верою славяще.

Запев. Крест всем воскресение, Крест падшим исправление, страстем умерщвление, и плоти пригвождение. Крест душам слава, и свет вечныи.

Запев. Крест врагом губитель, Крест злочестивым язва и пленение, и верным держава, благочестивым хранитель, и бесом отгонитель.

Слава. Крест страстем пагуба, Крест помыслом отгнание, Крест сокрушение языческо искусительно, и духовом показася ловительство.

И ныне. Крест воздвижется, и падают духов воздушных чинове. Крест снисходит, и нечестивии вси ужасаются, яко молнию видяще крестную силу. Катавасия.

Слава, И ныне.

Кондак, глас 4-й.

Вознесыися на Крест волею, тезоименитому ныне жительству Твоему, щедроты Твоя даруй Христе Боже. Возвесели силою Своею державу нашу, победы дая ей на сопостаты, пособие имущу Твое оружие, миру непобедимую победу.

Икос.

Иже до третияго Небесе восхищен бысть в Рай, и глаголы услышав божественыя неизреченныя, яже не леть есть языки человеческими глаголати. Что к галатом пишет, яко рачителем Писанию, прочтосте и разуместе: мне, рече, не буди хвалитися, токмо о Кресте Господни, на нем же страдав, уби страсти. Того убо и мы известно держимся, Креста Господня похвалы всех. Есть бо нам спасение сие древо, оружие миру непобедимая победа.

Песнь 7. Ирмос

Не послужиша твари, богомудрении паче Зиждителя, но огненое прещение мужески поправше, радовахуся поюще, препетыи иже отцем Господь и Бог благословен еси.

Запев: Пресвятая Троице Боже наш, услыши молитву раб Своих, молящихся Тебе.

Неразделную Троицу и неслиянную, естество единством богословим, Отца нерождена, и рождена Сына, и Святаго исходительнаго божественаго Духа песньми поюще, благословен Бог отец наших.

Запев: Пресвятая Троице Боже наш, услыши молитву раб Своих, молящихся Тебе.

Незаходительными молниями Твоими трисоставне, наши озари умныя очи, доброту Твою тресветне пресущественую зрети, яже человеком недоведомая, и неприступная Ангелом.

Слава. Лучами света Твоего, падшую ми душу возведи от глубины, благии Боже препетыи и всесильныи, поползшуюся от света благодатнаго, и во тму воглубльшуюся.

И ныне. Богородичен. Крестообразно простерши руце Чистая, к распростершему Свои руце на древе крестнем, и вознесшу естество наше, и умертвившему враждебныя полки, молящи не престай. Катавасия.

Песнь 8. Ирмос

Отроки благочестивыя в пещи, рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.

Запев. Высота Христовых страстей, и лук и оружие и мечь, оружие непостыдное, и сила непобедимая, Христово подножие, и победительство на враги, знамение царьствия, скипетре верных, показася Кресте победоносне.

Запев. Воздвигл еси наше падшее естество, Христом распеншимся, и совозставив, высото божественая, глубино неизглаголанная, Христово Ты еси знамение Кресте пребогате, и широта безмерная, и знамение непостижимыя Троицы Жизноносче.

Слава. Устнами, душею же и сердцем, Крест Господень лобызающе, приидите ныне вознесем вси и возвеличим, покланяющеся рцем вкупе песнь пречистую вопиюще, радуися великое богатство Кресте, церковное украшение.

И ныне. Древо жизни и спасения, древо безсмертия, древо разума, древо трилюбезно, нетленно и неизнуряемо, Крест трисоставныи, честное древо; Троицы бо носит трисоставныя образ. Катавасия.

Песнь 9. Ирмос

Всяк земен да взыграется Духом просвещаемь, да ликовствует же безплотных умов естество, почитая святое торжество Божия Матере, и да поют, радуися преблаженная, Богородице чистая присно Дево.

Запев с поклоном. Кто слышана сотворит, яко же пишет действия Твоя миролюбезныи Кресте, силы и чюдеса, и умершим востание. И мир весь совознесл еси, вознесыися к Богу многожелаемыи.

Запев. Утвержение верным, Крест треблаженныи, знамение и похвала, древо всесильное, Крест Христов великии и совершенныи, апостолом похвала, преподобным утвержение, и мучеником крепость и держава, царем победа и похвала.

Слава. Радуися Кресте, образе неописанныи, и многоименитыи, древо требогатное, страшно же и всеблаженно. Радуися Кресте всесвятыи и всесильныи. Радуися хранителю жизни нашея, Господень Кресте многопетыи.

И ныне. Кресте Честныи, хранитель души и телу буди ми, образом своим бесы низлагая, враги отгоняя, страсти упражняя, и благословение даруя ми, и жизнь и силу, содействием Святаго Духа, и честными Пречистыя мольбами. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе Сыне Божии,молитв ради пречистыя Ти Матере, силою Честнаго и Животворящего Креста и всех святых, помилуй и спаси нас, яко Благ и Человеколюбец. Аминь.