Канон святым мученикам Маккавеям

КАНОН, глас 8-й

Празднование 14 августа

Песнь 1. Ирмос

Воду прошед яко по суху, из египетска зла избежав, израильтянин вопияше, Избавителю Богу нашему поем.

Запев. Святии мученицы, молите Бога о нас (поклон).

Лик седмочисленых страдалец явлься, единым нравом в лютых, по утвержении отеческаго закона, умрети не отрекошася.

Запев. Славу презревше юже на земли, желанием Божественаго Царствия, всяку болезнь претерпеша божествении Маккавеи. Тем же достойно ныне чтутся.

Слава. Законом соблюдением моисейским, воистину доблии Маккавеи, внегда попрати, братия явишася друг другу, антиохово безбожие.

И ныне. Богородичен. Чини Тя ангел и человек, безневестная Мати, восхваляют непрестанно. Зиждителя бо всех, яко Младенца на руку Своею понесла еси.

Катавасия: Избавите от бед рабы своя, святии мученицы, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (трижды с поклонами).

Песнь 3. Ирмос

Небесному кругу верхотворче Господи, и церкви Зиждителю, Ты мене утверди в любви Своей. Желанием сыи край, верным утвержение, едине Человеколюбче.

Запев. По отеческих ходяще исправлениих законных, блаженнии Христовы страдальцы, жизнь нестареемую, своими стяжасте кровми прехвальнии.

Запев. Ни огнь ни мечь превратити когда, доблесть не возможе нрава блаженнии вашу, иже в вере, в ней же упразднисте мучителей шатания.

Слава. Муки претерпеша за Христа Бога, прехвалнии мученицы. И свыше прияша победы почести, непрестанно молящеся, спасти душа наша.

И ныне. Богородичен. Девою родила еси неискусобрачная. И Девою пребысть Мати безневестная, Богородице Марие, Христа Бога нашего моли спасти нас. Катавасия.

Седален, глас 8-й.

Благочестно наказавшеся отроцы мудрии, мученически мучителем прещения мужески посрамисте. Яко закону поборницы, и Отцу послушницы бысте святии, с материю Богомудрою усердно пострадасте. Темже и смертию живот искупльше, воистину небесныи, вечно радуетеся Маккавеи крепкодушнии. Молите Христа Бога, согрешением оставление даровати, чтущим любовию святую память вашу.

Слава, И ныне. Богородичен. Яко Деву едину в женах, Тя без семене рождьшую Бога плотию, вси ублажаем родове человечестии. Огнь бо вселися в Тя божества, и яко Младенца доиши Зиждителя и Господа. Темже ангельскии и человеческии род, достойно славим пресвятое рожество Твое. И согласно вопием Ти, моли Христа Бога, согрешением оставление даровати, воспевающим достойно славу Твою.

Песнь 4. Ирмос

Из горы присенныя Тя слове пророк, из единыя Богородицы, хотящася воплотити, боговидно разсмотрь, и со страхом славословяще силу Твою.

Запев. Закон блаженнии написавше, яко же древле Моисей во своих скрижалех помысла. Не преступисте сего даже до смерти, но твердо подвизастеся.

Запев. Законныя Богови приносяще жертвы, и моисейскому ревнующе житию, преобидеша всяко законоположение мучительско, страстотерпцы Христовы. Яко же камень волненое настояние, сице многи муки страдальцы, мужеским умом Маккавеи, даже до смерти претерпесте.

Слава. Безначалная Троице, единице поклоняемая, сопрестольная единице, Троице воспеваемая, мученик молбами избави нас, от бед и напастей, воспевающия Тя.

И ныне. Богородичен. Радуися от нас святая Богородице. Радуися яже радость рождьшая мирови. Радуися едина заступление человеком, благословеная Богородице чистая. Катавасия.

Песнь 5. Ирмос

Иже от нощи неведения, богоразумием просвещеи концы, просвети мя утром, славословия Твоего Господи.

Запев. Яко же отеческии закон не разорше святии мученицы, венцы праведными, Христос вас Сам венчал есть.

Запев. Елеазара дети, в разуме явльшеся преблаженнии. Принесостеся со онем Христови, духовно всесожжение.

Слава. Иже святыми свобождеи от лести всяческая, спаси нас Господи тех молитвами, яко благоутробен.

И ныне. Богородичен. Херувим явльшися честнейши, Дево всепетая, молися Сыну Своему, спасти душа поющих Тя. Катавасия.

Песнь 6. Ирмос

Ризу ми подаждь светлу, одеяися светом яко ризою, многомилостиве Христе Боже наш.

Запев. Ризою себе мученическою одеявше святии. Сию труды страдания вашего испестристе.

Запев. Желающе быти со Христом, всеславнии мученицы, течение страдания, неуклонным помыслом преидосте.

Слава. Закон иже предаде Моисей, храняще святии, законно пострадаша, посрамльше Антиоха мучителя.

И ныне. Богородичен. Едина словом плотию, Слова рождьшая, избави молимся от сетей врага, душа наша. Катавасия.

Слава, и ныне.

Кондак, глас 2-й.

Премудрости Божия столпи седмочислении, и божественаго света светилницы седмосвещьнии, Маккавеи всемудрии, прежде мученик велицыи мученицы. С ними же всех Богу молитеся, спастися поющим вас.

Икос.

Хвали тепле Сионе Бога твоего, яко укрепил есть сей верея врат твоих, и сыны твоя благослови. Сии бо яко воиньство победително, хранило воистину доблествено, и крепкомудрено, противу коварством злочестивых богомудрено сташа. Вкупе и победы венцы небеснаго Сиона приемлют. И божественому престолу предстоят, о всех непрестанно молящеся, просят спастися поющим их.

Песнь 7. Ирмос

Иже в начатцех землю основавыи, и небеса словом утверждь, благословен еси Господи Боже отец наших.

Запев. Мученическими пострадавше болезньми, мучительских не устрашистеся боязней. Христови вопиюще, благословен Бог отец наших.

Запев. (Повторяем стих).

Слава. Терпения пождавше болезней, вражия лютая победисте коварьства, Христови вопиюще, благословен Бог отец наших.

И ныне. Богородичен. Иже во утробу Девыя вселивыися, и Тоя ради Адама обновль, благословен Бог отец наших. Катавасия.

Песнь 8. Ирмос

Безначалнаго цесаря славы, Его же трепещут небесныя силы. Пойте священнии, людие превозносите Его во веки.

Запев. Истине рачителе, и закону известнии ревнителе бывше, прехвалнии мученицы, поете Христа во веки.

Запев. Седморасленыи плод святаго корене, яко воистину седмь Маккавей, и мученики Господни почтем достойно. Закону ревнителей, единодушныя страдальцы вернии, седмь Маккавей с рождьшею их, почтем достойно.

Слава. Троице неразделимая единице, в божестве славлю едину, и в триех пою тя лицех едину силу.

И ныне. Богородичен. Иже в последняя нас ради, от Девы воплощеннаго Бога, священнии пойте, и превозносите Его во веки. Катавасия.

Песнь 9. Ирмос

Возвеличим Тя Матерь света, и прославим Тя Богородице Дево. Яко Спаса рождьши душам нашим.

Запев с поклоном. Сокровище божественых даровании, воистину показастеся. Богатьство неотъемлемое, всехвалнии мученицы.

Запев. Молитвеницы доблии, к Зиждителю всех суще, испросите невлаемую жизнь душам нашим. Иже божественою ревностию и теплотою души, творящыя вашу память, сохраните неснедаемы от лукаваго.

Слава. С Сыном Отцу и Духу правому поклонимся (поклон) со ангелы зовуще, слава в вышних Богу.

И ныне. Богородичен. Радуися Двере Святая, Богови отверзстая, единому Премудру. Юже осени Дух Святыи. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святых мученик седми братии по плоти Маккавей, и учителя их Елеазара, и матере их Соломонии, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.