Канон святому великомученику Пантелеймону

Канон, глас 2-й

Празднование 9 августа

Песнь 1. Ирмос

Во глубине потопи древле, фараонитская вся воинства, преоружена сила. Воплощьжеся Слово, преспеющыя грехи потребил есть. Преславныи Господь, яко прославися.

Запев: Святыи великомучениче Пантелеймоне, моли Бога о нас (поклон).

Приступль усердно ко Христу, прежде скончания еже о Христе, мертвеца первее воздвиже. Ныне же мя пребогате, умерщвена греховными снедении, твоими мольбами о, Пантелеймоне, оживи.

Запев. Восия яко же звезда, нося во юности старостныи и богомудрыи разум. Добротою же тела, благолепие души стяжав, Препрославленому Слову явился еси прекрасен.

Запев. Умертвився миру, и во Христа блаженне одеявся, банею крещения бысть богоносен орган, и приятелище действа Духу. Всем угождая, всем уврачуя недуги.

Слава. Премудрость сестру себе притворив, и причастник жизни ведом от нея почтеся. И венцем даровании украсися. Божественыя зари блаженне облистая светлостию.

И ныне. Богородичен. Благословеньми Пресвятая Чистая, естество удалено преслушанием бывшее от Зиждителя Христа рождьши венчала еси, и тления свободи. Тем же радующеся, вси вернии Тя ублажаем.

Катавасия: Избави от бед рабы своя, святыи великомучениче Пантелеймоне, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).

Песнь 3. Ирмос

Процвела есть пустыня яко крин Господи, язычна неплодящая церкви, пришествием Ти. О ней же утвердися мое сердце.

Запев. Словеса Духа услышав, был еси яко земля добрая и плодная. Приемши семя многоценно, и рождьши треблаженне спасение душам.

Запев. Умертвил еси мудрование, змиина угрызения. И душу оживил еси, богодухновенен быв, и Цареви всех предстоя.

Запев. Посрамил еси безбожное мучителей повеление, и Христови притекл еси, вместо всех Сего стяжав. И был еси богомудре великии купец.

Слава. Матере своея благочестие возлюбль славне. Отчее же возненавидел еси безбожие многомятежное. Яко имея разум, лучшее избрал еси.

И ныне. Богородичен. Носяи божественым мановением, всю тварь Господь, на руку носится Твоею Дево. Его же ныне моли, избавити от бед поющыя Тя.

Седален, глас 4-й.

Добляго страдальца благочестия Христова, восхвалим светло, Пантелеймона вернии, псалмы и пеньми и

Песньми духовными. Им же мучительство невидимаго врага, силою божественою попрася. И недугом исцеление богатно от Господа даровася, творящым верно божественыи и честныи праздник Его.

Другой седален.

Ермолая мудраго мучениче словеса послушал еси. И оставил еси абие художество земленое, яко мерзко, яко некрепко, яко губительно. Имея Христовы страсти, учения жизни в сердцы своем. Не исцельно страждущым, здравие Пантелеймоне даруя. Тем же молися о творящих любовию память твою.

Слава, И ныне. Богородичен. Треволнении страстей, несмысленыи аз, обуреваемь Чистая, призываю Тя тепле, не презри мене погибнути окаяннаго, бездну милости рождьшая. Разве бо Тебе надежду не имам. Да не убо врагом обрадование и смех, упование имыи на Тя явлюся. Ибо можеши елика хощеши, яко Мати сущи всех Бога.

Песнь 4. Ирмос

Пришествовав от Девы, не ходатай ни Ангел, но Ты Сам Господи воплощься, и спасе всего мя человека. Тем вопию Ти, слава силе Твоей.

Запев. Последуя Владыце любовию, расточил еси богатьство нищым. Себе обнажая к страданию, еже и прошел еси, вечныя надежди провиде.

Запев. Хваления Богови жертву принесл еси, яве возгнушався идольских треб. Все же шатание нечестивых страстотерпче попрал еси.

Запев. Снедаемым завистию, и гневом борющим, не поборимую силу сим представил еси мучениче, и победил еси злочестивое томление вооружився.

Слава. Иже старца Симеона рукама держимыи, старца тя глаголы Пантелеймоне улови, к божественому разумению, и ко многих спасению и избавлению.

И ныне. Богородичен. Юныя и девы во след Тебе потекоша, Деву и Отроковицу Тя и Матерь зряще. Едина бо обоя во едино собрала еси, несказанно Богоневесто. Катавасия.

Песнь 5. Ирмос

Просвещение во тме лежащим, и спасение неначаемым Христе Спасе мой, к Тебе утренюю Царю мирныи, просвети мя сиянием си, иного бо разве Тебе бога не знаем.

Запев. Радостно подвиги подъял еси мучения. Огражден силою божественою и терпением, твердо мучения подъемля. Радуяся вопияаше иного бо разве Тебе бога не знаем.

Запев. Юношеско ты противление имея, и твердостию души воставление стяжав. Всяку язву доблествене претерпе, и мужеским блаженне умом. Благодатию Божественаго Креста укрепляемь.

Слава. Несогласное отрину вещание заблуждьших, небесным учением страдалец. И многим спасению преславну бысть виновник, Твоим действом Христе укрепляемь.

И ныне. Богородичен. Речения премудрых, и гадания вся Препрославленая, и пророк проречения, Тя проображаху, проявленно напоследок быти Божию Родительницу. Иныя бо разве Тебе Чистыя не знаем. Катавасия.

Песнь 6. Ирмос

В бездне греховней одержимь, неизследную милосердия Твоего призываю бездну, от тли Боже мой возведи мя.

Запев. Идолы лестныя оплевал еси, и возносимую прелесть упразднил еси. Чудодействуя дивная, и творя исцеления богомудре.

Запев. Венечник показася всеизрядне. Сквозе бо огнь ты пройде и воду. И на колеси протязаемь, преславно погубил еси безумныя.

Слава. Мучителей суровьство низложил еси. Неудобь носимая биения телесная, душевною крепостию пострадал еси, богомудре благодатию.

И ныне. Богородичен. Содержаи концы земли яко Бог, Твоима рукама Чистая держится, описанием тела, иже Божественым зраком не описанныи. Катавасия.

Слава, и ныне. Кондак, глас 5-й.

Подобник сыи Милостивому, и исцелением благодать прием, страстотерпче и мучениче Христа Бога Пантелеймоне, молитвами твоими, душ наших недуги исцели, отгоняя присно ратника соблазны, от вопиющих непрестанно, спаси нас.

Икос.

Безсребреника память, добляго страдальца, вернаго целебника, благочестно воспоем христолюбцы, да приимем милость. Паче же оскверньшии, якоже и аз своя храмы. Душам бо и телом возлюблении исцеления подавает. Потщимся убо верная братия, в сердцах наших имети его крепость, избавляюща от лести вопиющыя, спаси нас Господи.

Песнь 7. Ирмос

Телу златому премудрыя дети не послужиша, и в пламень сами поидоша, и боги их обругаша. Среди пламене возопиша, и оброси их Ангел, услышася уже уст ваших молитва.

Запев. Законно стражда, и победив врага. Пристанище благоутишно, иже в мори славне обуреваемым был еси. Свет же сущым во тме жития, их же пети научил еси, благословен Бог отец наших.

Запев. Блажен еси и добро тебе есть ныне преблаженне. Восприимшему пребогатную и блаженную надежду свою, уготованную верою Господеви зовущым, благословен Бог отец наших.

Слава. Святых душа, и праведных лицы, и бесплотных чин Ангельскии прият, сликовника блаженне. Мечем бо усечен быв во главу, поеши радуяся, благословен Бог отец наших.

И ныне. Богородичен. Оружие еже прежде древа животнаго, нас отлучившее, ныне обращаемо приемлет, знаменавшыяся кровию, иже из ребр Сына Твоего изшедшею Пренепорочная. Благословена еси яже Бога плотию рождьшая. Катавасия.

Песнь 8. Ирмос

В пещь огнену, к детем еврейским сошедшаго, и пламень на хлад преложьшаго Бога, пойте вся дела Господа, и превозносите Его во веки.

Запев. Художное твоея благоцветущия души, неразумие отца исцеляет. Подающи свет верою преблаженне притекающым, и ко Спасу Христу наставляющи.

Запев. По Христе заклан быв, к вечной жизни преминул еси. И богозванен явися, именованием Божиим богомудре. Тем почитаем тя, и превозносим Христа во веки.

Слава. Витийское отложь, и лютое мудрец поучение, Христовем призыванием. И лютых страстей корения посекаеши, исцеляя поющыя Христа во веки.

И ныне. Богородичен. Безсмертия зарю вемы источника Тя Богородице, яко рождьшую Слова Безсмертнаго Отца, иже всех смерти избавляющаго, превозносящих Его во веки. Катавасия.

Песнь 9. Ирмос

Безначальна Родителя Сын Бог и Господь, воплощься от Девицы нам явися, омраченыя просветити, собрати расточеныя. Тем же всехвальную Богородицу величаем.

Запев с поклоном. Преставися радуяся к желанию конечному, идеже вселься преблаженне, блаженныи конец прияти сподобися. Воистину сыи со Владыкою си, во веки безконечныя.

Запев. Желание получил еси, и любве Твоея исполнение, каплющи еще теплей крови, яже по Христе излиявшися. От Него же радуяся приял еси венцы подвиг твоих.

Запев. Львом уста, и зверем зияния, яко же Даниил древле ты обуздал еси. Весть бо стыдетися мучениче добродетели, и безсловесное естество. Тем же тя преславне, сошедшеся ублажаем.

Слава. Богатную милость тебе Христос дарует. Сокровище исцелением нам даруя, и Всемилостива изволением, тя подав всякому скорбящему, и пристанище тихо, и предстателя и защитителя.

И ныне. Богородичен. Яко руно Всенепорочная, Дождь Небесныи во утробе заченши нам родила еси, иже тишину дающаго, яко Бога Того поющым, и Тя всепетую Богородицу проповедающым. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе Сыне Божии, молитв ради пречистыя Твоея Матере, и святаго великомученика Пантелеймона, и всех ради святых, помилуй и спаси нас, яко Благ и Человеколюбец. Аминь.