Канон Рожеству Пресвятыя Богородицы

Канон Рожеству Пресвятыя Богородицы

Празднование 21 сентября

Рождество Пресвятой Владычицы нашей Богородицы и Приснодевы Марии — первый двунадесятый (от славянского «дванадесять» — двенадцать) православный праздник церковного года. Первый он и по хронологии событий новозаветной истории, и по церковному календарю, который начинается с сентября и потому называется в Богослужебных песнопениях «началом нашего спасения». Рождение Божией Матери явилось исполнением пророчеств о том, что вскоре придет на землю Христос, Спаситель мира. Праздник Рождества Пресвятой Богородицы ежегодно отмечается Церковью 21 сентября (8 сентября по старому стилю), является непереходящим и имеет 1 день предпразднества и 4 дня попразднества.

Тропарь, глас 4-й

Рожество Твое Богородице Дево, радость возвести всей вселенней. Из Тебе бо восия Солнце правде Христос Бог наш, разрушив клятву, даст благословение, и упразднив смерть, дарова нам живот вечныи.

Канон, глас 2-й

Песнь 1. Ирмос

Грядите людие, поем песнь Христу Богу, раздельшему море, и проведшему люди, яже испусти из работы египетския, яко прославися.

Запев: Пресвятая Госпоже Богородице, услыши молитву раб Своих, молящихся Тебе (поклон).

Грядите вернии, Духом Божественым радующеся, Юже от неплодове днесь прошедшую, человеком на спасение, присно Деву Отроковицу песньми почтем.

Запев: Пресвятая Госпоже Богородице, услыши молитву раб Своих, молящихся Тебе (поклон).

Грядите вернии, Духом Божественым радующеся, Юже от неплодове днесь прошедшую, человеком на спасение, присно Деву Отроковицу песньми почтем.

Слава.

Радуйся Чистая, Мати и Рабо Христа Бога, яже первому ходатаице блаженству, человеческии род Тя, вси достойно песньми славим.

И ныне.

Живота раждается днесь мост, им же человецы возведение падения еже от ада обретшии, Христа Жизнодавца песньми прославляют.

Катавасия: Спаси от бед рабы Своя Богородице Дево, яко вси по Бозе к Тебе прибегаем, яко к нерушимей стене и заступлению (поклон).

Господи помилуй (трижды с поклонами).

Песнь 3. Ирмос

Утверди нас Собою Господи, древом умерщвеи прегрешения, и страх Твой всади в сердца наша, яко Человеколюбец.

Запев: Пресвятая Госпоже Богородице, услыши молитву раб Своих, молящихся Тебе (поклон).

Непорочно Богови пожившая, всех породиста спасение, Богомудрая родителя, Зиждителя рождьшую и Бога нашего.

Запев: Пресвятая Госпоже Богородице, услыши молитву раб Своих, молящихся Тебе (поклон).

Утверди нас Собою Господи, древом умерщвеи прегрешения, и страх Твой всади в сердца наша, яко Человеколюбец.

Слава.

Всем жизнь источаяй Господь, от неплодове произведе Деву, в Ню же вселитися сподоби, и по рожестве сохранив нетленну.

И ныне.

Аннин плод, Марию днесь, грозд рождьшую живоносныи, яко Богородицу воспоем, Предстательницу же всех, и Помощницу. Катавасия.

Слава, и ныне.

Седален, глас 4-й.

Девая Мария и Богородица воистину, яко облак света днесь восия нам, и от праведнику происходит в славу нашу. Не к тому Адам осуждается, и Евва от уз свободися. И сего ради зовем вопиюще, со дерзновением Единой Чистей, радость возвещает рожество Твое всей вселенней.

Песнь 4. Ирмос

Услышах Господи, слух Твоего смотрения, и прославих Тя Единаго Человеколюбца.

Запев: Пресвятая Госпоже Богородице, услыши молитву раб Своих, молящихся Тебе (поклон).

Воспеваем Тя Господи, верным спасеное пристанище, подавшаго всем Тебе Рождьшую.

Запев: Пресвятая Госпоже Богородице, услыши молитву раб Своих, молящихся Тебе (поклон).

Услышах Господи, слух Твоего смотрения, и прославих Тя Единаго Человеколюбца.

Слава.

Тя Богоневестная, похвалу всех Христос явил есть, и утвержение поющим верно Твое таинство.

И ныне.

Неискусобрачная Владычице, Твоими молитвами, избавляеми прегрешении, благоразумну вси Тя ублажаем.

Катавасия: Спаси от бед рабы Своя Богородице Дево, яко вси по Бозе к Тебе прибегаем, яко к нерушимей стене и заступлению (поклон).

Песнь 5. Ирмос

Яко сень писаннаго мрака гадание разорь, и верных сбытием истинным, Богоотроковицы ради озарив сердца, и нас светом Твоим Христе озари.

Запев: Пресвятая Госпоже Богородице, услыши молитву раб Своих, молящихся Тебе (поклон).

Воспоем людие всех Ходатайцу, иже по нас быти виновному. Ея же образу радовахуся сподобльшеся пророцы, искони спасение от Тоя плодяще.

Запев: Пресвятая Госпоже Богородице, услыши молитву раб Своих, молящихся Тебе (поклон).

Яко сень писаннаго мрака гадание разорь, и верных сбытием истинным, Богоотроковицы ради озарив сердца, и нас светом Твоим Христе озари.

Слава.

От суха жезла прозябение, священнику, Израилеви показа разсуждение. И ныне светлость прозябших преславно, научает от неплодове преславное рождение.

И ныне.

Яко сень писаннаго мрака гадание разорь, и верных сбытием истинным, Богоотроковицы ради озарив сердца, и нас светом Твоим Христе озари.

Катавасия: Спаси от бед рабы Своя Богородице Дево, яко вси по Бозе к Тебе прибегаем, яко к нерушимей стене и заступлению (поклон).

Песнь 6. Ирмос

К Господу от кита Иона вопияше, Ты мя возведи из глубины ада Владыко, да яко Избавителю во гласе хваления, истинным же Духом пожру Ти.

Запев: Пресвятая Госпоже Богородице, услыши молитву раб Своих, молящихся Тебе (поклон).

К Господу в скорби неплодства возописта, Божия Матере богомудрая родителя, и Сию в роды родов родивше, на общее спасение и похвалу.

Запев: Пресвятая Госпоже Богородице, услыши молитву раб Своих, молящихся Тебе (поклон).

К Господу от кита Иона вопияше, Ты мя возведи из глубины ада Владыко, да яко Избавителю во гласе хваления, истинным же Духом пожру Ти.

Слава.

Прияша небесныи дар достоин Богови, Божию Матерь, богомудрая родителя, самех Херувим превышше носило, Слова и Зиждителя Родительницу.

И ныне.

К Господу от кита Иона вопияше, Ты мя возведи из глубины ада Владыко, да яко Избавителю во гласе хваления, истинным же Духом пожру Ти.

Катавасия: Спаси от бед рабы Своя Богородице Дево, яко вси по Бозе к Тебе прибегаем, яко к нерушимей стене и заступлению (поклон).

Слава, и ныне.

Кондак, глас 4-й.

Иоаким и Анна поношения безчадства, и Адам и Евва, от тли смертныя свободистася, Пречистая, святым рожеством Твоим. То празднуют и людие Твои, вины греховныя избавльшеся вопиюще Ти, неплоды раждает Богородицу и питательницу жизни нашея.

Икос.

Молитва купно и воздыхание, неплодства и безчадства, Иоакима и Анны богоприятное, во уши Господни вниде, и прозябе Плод живоносен миру. Ов бо молитву на горе творяше, ова же в саде поношение ношаше. Но с радостию, неплоды раждает Богородицу, и питательницу жизни нашея.

Песнь 7. Ирмос

Купина в горе огнем не опалима, и обросима пещь халдейская, яве прописа Тя Богоневестная, Божественыи бо Безплотныи в плотне чреве, Огнь неопально прият. Тем же из Тебе Рождьшемуся зовем, благословен Бог отец наших.

Запев: Пресвятая Госпоже Богородице, услыши молитву раб Своих, молящихся Тебе (поклон).

Твое в вещественых явление, Законодавец возбрани разумети. Великое Пречистая таинство, не мудрити нижних, образно наказуя иногда. Темже удивлься чудеси глаголаше, благословен Бог отец наших.

Запев: Пресвятая Госпоже Богородице, услыши молитву раб Своих, молящихся Тебе (поклон).

Купина в горе огнем не опалима, и обросима пещь халдейская, яве прописа Тя Богоневестная, Божественыи бо Безплотныи в плотне чреве, Огнь неопально прият. Тем же из Тебе Рождьшемуся зовем, благословен Бог отец наших.

Слава.

Гору и дверь небесную, и мысленую лествицу боголепно, лик божественыи пронарече. От нея же камень отсечеся, не руками мужескими, и дверь ею же пройде Господь, иже чудесем Бог отец наших.

И ныне.

Купина в горе огнем не опалима, и обросима пещь халдейская, яве прописа Тя Богоневестная, Божественыи бо Безплотныи в плотне чреве, Огнь неопально прият. Тем же из Тебе Рождьшемуся зовем, благословен Бог отец наших.

Катавасия: Спаси от бед рабы Своя Богородице Дево, яко вси по Бозе к Тебе прибегаем, яко к нерушимей стене и заступлению (поклон).

Песнь 8. Ирмос

В пещи отрочестей, прообразил еси иногда Свою Матерь Господи. Образ же сих огня избавляше, не опально вшедших. Юже поем явльшуся Тобою концем днесь, и превозносим во вся веки.

Запев: Пресвятая Госпоже Богородице, услыши молитву раб Своих, молящихся Тебе (поклон).

Иже к Богу нашего примирения пронареченая скиния, ныне быти начинает, рождьши Слово, нам дебельством плоти явльшася. Его же поем, от небытия бытие тем приемшии, и превозносим во вся веки.

Запев: Пресвятая Госпоже Богородице, услыши молитву раб Своих, молящихся Тебе (поклон).

В пещи отрочестей, прообразил еси иногда Свою Матерь Господи. Образ же сих огня избавляше, не опально вшедших. Юже поем явльшуся Тобою концем днесь, и превозносим во вся веки.

Слава.

Неплодныя преложение, мирное благих разреши неплодьство, и ясно чудо Христа показа, к земным пришедша. Его же поем, иже от небытия бытие приемшии, и превозносим во вся веки.

И ныне.

В пещи отрочестей, прообразил еси иногда Свою Матерь Господи. Образ же сих огня избавляше, не опально вшедших. Юже поем явльшуся Тобою концем днесь, и превозносим во вся веки.

Катавасия: Спаси от бед рабы Своя Богородице Дево, яко вси по Бозе к Тебе прибегаем, яко к нерушимей стене и заступлению (поклон).

Песнь 9. Ирмос

Яже прежде солнца светильника Бога восиявша, плотию к нам пришедшаго из боку Девичу неизреченно вочеловечшася, благословеная Чистая, Тя Богородице величаем.

Запев с поклоном. Пресвятая Госпоже Богородице, услыши молитву раб Своих, молящихся Тебе (поклон).

Иже непокоривым людем, из камене источив воду. Благопокоривым же языком, дарует от чресл неплодных, плод на веселие нам, Тя Богомати чистая, юже достойно величаем.

Запев: Пресвятая Госпоже Богородице, услыши молитву раб Своих, молящихся Тебе (поклон).

Яже прежде солнца светильника Бога восиявша, плотию к нам пришедшаго из боку Девичу неизреченно вочеловечшася, благословеная Чистая, Тя Богородице величаем.

Слава.

Иже немилостивнаго древняго погубления осуждение, и праматере исправление, иже роду к Богу вину присвоения, к Зиждителю мост, Тя Богородице величаем.

И ныне.

Яже прежде солнца светильника Бога восиявша, плотию к нам пришедшаго из боку Девичу неизреченно вочеловечшася, благословеная Чистая, Тя Богородице величаем.

Катавасия: Спаси от бед рабы Своя Богородице Дево, яко вси по Бозе к Тебе прибегаем, яко к нерушимей стене и заступлению (поклон).

3адостойник: Чуже есть матерем девою быти, и странно девам дети раждати: на Тебе Богородице обое смотрение бысть, тем Тя вся племена земная, непрестанно величаем. (Поклон земной).

Отпуст: Господи Исусе Христе Сыне Божии, молитв ради пречистыя Твоея Матере, честнаго и славнаго Ея Рожества, и всех святых, помилуй и спаси нас, яко Благ и Человеколюбец. Аминь

Припев: Пресвята́я Богоро́дице, спаси́ на́с.

И́же непокори́вым лю́дем из ка́мене источи́в во́ду, благопокори́вым же язы́ком да́рует от чре́сл непло́дных пло́д на весе́лие на́м, Тя, Богома́ти Пречи́стая, Ю́же досто́йно велича́ем.

Напра́снаго дре́вняго Отъя́тельницу осужде́ния и прама́тере исправле́ние, Ю́же ро́да к Бо́гу вы́ну присвое́ния, к Зижди́телю мо́ст, Тя, Богоро́дице, велича́ем.

Светилен

От непло́дныя дне́сь А́нны цве́т произы́де, Богоро́дица, вся́ благово́ния Боже́ственнаго исполня́ющи концы́ ми́ра, и ра́дости всю́ наполня́ющи тва́рь, Ю́же пою́ще, досто́йно восхваля́ем, я́ко су́щу земноро́дных превы́шшую

Тропарь, глас 4

Рождество́ Твое́, Богородице Де́во,/ ра́дость возвести́ всей вселе́нней:/ из Тебе́ бо возсия́ Со́лнце пра́вды Христо́с Бог наш,/ и, разруши́в кля́тву, даде́ благослове́ние,\ и, упраздни́в сме́рть, дарова́ нам живо́т ве́чный.

Кондак, глас 4

Иоаки́м и А́нна поноше́ния безча́дства,/ и Ада́м и Ева от тли сме́ртныя свободи́стася, Пречи́стая,/ во святе́м рождестве́ Твое́м./ То пра́зднуют и лю́дие Твои́,/ вины́ прегреше́ний изба́вльшеся,/ внегда́ зва́ти Ти:\ непло́ды ражда́ет Богоро́дицу и пита́тельницу Жи́зни на́шея.

Величание:

Велича́ем Тя, Пресвята́я Де́во, и чтим святы́х Твои́х роди́телей, и всесла́вное сла́вим Рождество́ Твое́