Канон Нерукотворенному Образу

Канон Нерукотворенному Образу

Празднование 29 август

Тропарь, глас 2-й

Пречистому Ти образу покланяемся Благии (поклон), просяще прощения согрешением нашим Христе Боже: волею бо благоизволил еси взыти на крест, да избавиши яже созда от работы вражия. Тем благодаряще вопием Ти, радости вся исполнивыи Спасе наш, пришедыи спасти мир. (Дважды).

Слава, и ныне. (Повторяем тропарь).

КАНОН, глас 4-й

Песнь 1. Ирмос

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чюдеса.

Запев: Милостиве Господи, услыши молитву раб Своих, молящихся Тебе (поклон).

Отверзем уста человецы, и язык уясним, в нарочитыи день праздника нашего явление божественаго образа, Христа Бога нашего, светло славяще.

Запев. Свет превечныи, Отча исполняя словеса, образноподобием плоти, прежде виден бысть человеком: ныне же явися образом нерукотворенным, божественаго воплощения свет облистая нам.

Слава. Сказати хотя Свою благодать Вышнии, прият рабии образ нас ради, и на уверение естества человеческаго, зрака подобие верным днесь дарова.

И ныне.

Богородичен.

Сказание днесь воистину, богочеловеческаго Твоего рожества познахом, Тя чтуще Всечистая, сподоблени бывше видети зрака образ нерукотворенныи, Рождьшагося из Тебе.

Катавасия: Сохрани от бед рабы Своя Милостиве, яко усердно к Тебе прибегаем к милостивому Избавителю и всех Владыце Господу Исусу (поклон). Господи помилуй (трижды с поклонами).

Песнь 3. Ирмос

Твоя певцы Богородице, живыи нетления источниче, лик Себе совокупльши духовен утверди. И в божественей Ти славе, венцем славы сподоби.

Запев. Владыка сыи по существу, уединься рабом плотию, и наше детельствуя различно спасение Христе, еже и ныне промышляя, Своим образом виден бысть нам.

Запев. Едес честнейшии град, честныи божественыи образ Твой, иже твердыи залог веры деля прият, царскии же Твой град, дар яко лучшии приемлет ныне.

Слава. Живот составныи ныне, вкуси смерти плотьския, ею же живот источил еси мертвым востанием си Христе. Ныне же яко живота Ходатая, зрака образ Твой подал еси нам.

И ныне. Богородичен. Из Тебе спасение иже суть в мире, возсия прежде плотию. Ныне же живот явися в мире, верным ходатайством Ти, светоносное пришествие, прежеобразнаго подобия Христова. Катавасия.

Слава, и ныне.

Седален, глас 4-й.

Сшедыи с небесе за милосердие милости, благоутробне Спасе, плоти Твоея пресвятыя днесь пречистыи зрак, граду чтущему Тя, и людем христоименитым, сокровище подал еси, яко твердо всеоружие, от него же почерпающе освящение, сего верою тепле приимем.

Песнь 4. Ирмос

Неизследному Божию совету, еже от Девы воплощению, Тебе Вышняго, пророк Аввакум дивяся вопияше, слава силе Твоей Господи.

Запев. Плотоподобныи божественыи образ, иже плотию приближшагося человеком, прииде к новоизбранному Израилю, яко из Египта днесь, и просвещает концы.

Запев. Боговидения славы древле, темно Твоих задних сподобися Моисей, просив: а новыи Израиль, лицем ныне в лице Тя Избавителя видит ясно.

Слава. Видите чюдная вси людие, и духовно ныне возвеселитеся, Христа поюще даровавшаго нам, яко многоценное богатство, Своего зрака воображение.

И ныне.

Богородичен.

Яко на облаце убо древле Христос явися, на земли сущим, седя на Твоею руку. Ныне же на последок, людем чтущим Тя Всечистая, божественым образом явися. Катавасия.

Песнь 5. Ирмос

Удивишася всяческая, о божественей славе Твоей, Ты бо браконеискусимая Девице, прият во утробе надо всеми сущаго Бога, и родила еси безлетнаго Сына, всем воспевающим Тя мир подавающа.

Запев. Восплещем днесь руками, и воскликнем гласом хваления Господеви: се бо воистину прииде и явися, вся озаряя верныя, божественным подобием, чистыя плоти Его.

Запев. Просветися днесь православных соньмище, еретическии же полк да посрамится, поклоняем видя нерукотворенныи образ, плотию нам Избавителя предложшиися.

Слава. Тайна велика пришедшее торжество, свет бо лица Господня мирови провозсия, богоустроенным образом, и богочертанными самого руки божественными писании, ими же укрепися преже Авгарь.

И ныне.

Богородичен.

Да каплют ныне свыше облацы, земленым сладость. Ходатайством бо Ти Дево, мира ущедри Твой Сын и Бог, рог верным спасения днесь дарова, Свой божественныи образ. Катавасия.

Песнь 6. Ирмос

Божественное се и всечестное совершающе празднество, богомудрении Божия Матере, приидите руками восплещем, от Нея Рождьшагося верою славяще.

Запев. Мертвым живот возсия, слепым свет уже пришествова, немощным люте врачевство отверзеся, и всем спасение днесь приближися.

Запев. Странствует всяк разум, невеществена зрака видя, божественыи образ Христов, воображен ныне ясно, и просвещение источая, поклоняющимся Ему (поклон).

Слава. Путь Христов уготовим, и ныне осанна Христови зовуще, благословено Божия славы имя, еже на образе божествене явльшееся, сущим на земли.

И ныне.

Богородичен.

Знаемо явися странам, Богомати чистая спасение: воображение Спаса нашего рождьшагося из Тебе, видети Твоим ходатайством, ныне сподобихомся. Катавасия.

Слава, и ныне.

Кондак, глас 2-й.

Неизреченнаго и божественаго Ти к человеком смотрения, неописанное Отчее Слово, образ неписанныи и богописанныи поведателен, видяще неложнаго Ти воплощения, почитаем Того лобызающе.

Икос.

Уверяя человеком Господь, вочеловечения Своего тайну ужасную, самописует богомужныи Свой образ на убрусе, и первообразное убо вознес от горы Елеонския, на престоле спосажает Отчи, поклонятися от безтелесных ангел: подобие же первообразнаго нам дарова поклонятися, его же объемлюще душею же и сердцем, почитаем того лобызающе.

Песнь 7. Ирмос

Непослужиша твари богомудрении паче Зиждителя, но огненное прещение мужески поправше. Радовахуся поюще, препетыи иже отцем Господь и Бог благословен еси.

Запев. Всяк град радуется празднуя верно, с новым Сионом, Царь бо его кротко пришел есть, не на жребяти яко же прежде: на образе же, спасая верою поющыя, Боже благословен еси.

Запев. Речь божественая безплотных исполнися, иже гласа Господня услышавше прежде, ныне видехом обличие Его, ясно просвещаеми, светодательными сиянии того явления.

Слава. Веселятся с земными небесная, и срадуются всех святых множество. Царие и князи, богатии и убозии празднуют, явльшуся днесь божественому образу.

И ныне. Богородичен. Священницы в правду облецытеся, и вси преподобнии возрадуйтеся светло: се убо уготова светилник нам Христос, еже образа Своего богодельное подобие, еже прият от Девы. Катавасия.

Песнь 8. Ирмос

Отроки благочестивыя в пещи, рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.

Запев. Совершен сыи по существу, Бог и Человек виден бысть совершено спасая по обоему, Своя воистину свойства. Яко Бог бо человеческии образ уверяя, безплотне вообрази, Его же нам яко стену и покров даровал есть.

Запев. Вознеси рог Божии слове, исповедающих Тя Бога и Человека, и богоначертанному образу поклоняющихся, им же живот вечныи, всем даровася верным, и упраздни поганская шатания, Твоея неведущих божественыя силы.

Слава. Светится новая Церкви, славы бо свет возсиял есть, плотоподобозрачное обличив Бога нашего, безплотное же украси, Един яко же весть сам, лице Свое просветив, на спасение людей христоименитых.

И ныне.

Богородичен.

Всю освятил есть тварь, прежде от святаго Ти возсия чрева Дево: но превозсиял есть Того паче днесь, яко от незаходимых явльшуся. Того божественому образу, от земли поганския преславно, дав на спасение верным людем и граду. Катавасия.

Песнь 9. Ирмос

Всяк земен да взыграется, Духом просвещаем, да ликовствует же безплотных умов естество, почитая святое торжество Божия Матере, и да поют, радуися Преблаженная, Богородице чистая присно Дево.

Запев с поклоном. Радуися тайно, Божии христолюбивыи ныне великии граде. К тебе бо прииде царствуяи всею тварию, божественаго ради обличия, первообразнаго подобия, и тебе изволил есть избрати Себе в жилище.

Запев. Поем Богу песнь благодарную, изволившему богатство превелико нам подати, стену необориму, и неблазнено утвержение, боговоображенныи зрак божественыя плоти Его, Его же чтуще вернии величаем.

Слава. О паче ума чюдес Твоих Господи, их же сотвори нам на Тя надеющимся. Яко же бо име неизреченно Рожество, тако и странно всем показа воображение, зрака Твоего недоразумное, Его же чтущия ны избави от всякаго гнева.

И ныне.

Богородичен.

Высота воистину, и глубина неизреченна, Твоея тайны Чистая: яко же бо изыде несказанно из Тебе Вышнии, тако и виден бысть днесь, пришед к нам безплотным светом зрака Его, плотию смешся вещи с земными. Катавасия.

Отпуст: Иже неизреченным промыслом, прежде Своея вольныя страсти, благоизволивыи вообразити пресвятыи нерукотворенныи образ, пречистаго и боговочеловечнаго Лица Своего на плащанице, иже есть святыи убрус, Господи Исусе Христе, Сыне Божии, молитв ради пречистыя Твоея Матере, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.