Канон святым мученицам Вере, Надежде, Любви и матери их Софии

Канон святым мученицам Вере, Надежде, Любви и матери их Софии

Празднование: 17 / 30 сентября

Канон, глас 1-й

Тропарь, глас 1-й

Агницы словесныя Агнцу и Пастырю приведостеся мучением, ко Христу течение скончавше и веру соблюдше. Тем же днесь радостною душею совершаем досточюднии святую вашу память, Христа величающе. (Дважды).

Слава, и ныне. Богородичен. Гавриилу провещавшу Ти Дево, еже радуися. И со гласом воплощашеся всех Владыка, в Тебе святем киоте, яко же рече праведныи Давыд. Явися пространнейши небес, поносивши Зиждителя Своего. Слава всельшемуся в Тя, слава прошедшему из Тебе, слава свободившему нас рожеством Своим.

Песнь 1. Ирмос

Твоя победителная десница боголепно в крепости прославися. Та бо безсмертне всемогущи, противныя сотре, израильтяном путь глубины обновльши.

Запев: Святии мученицы, молите Бога о нас (поклон).

Премирныя Ти Христе, и неизреченныя Премудрости сияние, даруй ми Владыко, ради благославныя и святыя Твоея мученицы, яко да воспою ея порождения.

Запев. Именование ти яве, житием богомудрая украсися. Весь бо проводила еси живот свой премудростным желанием, славная София мудрости благодать восиявши.

Запев. Твой преблаженныи плод, пребожественыя Троицы числом, украшаемь страдалчески. За Ту Самую восия премудрая София, Премудрости божественей тезоименитая.

Слава. Тело и душу добродетельми очистивше, девыя отроковицы, трие Тебе приведошася, мученически разумному Жениху Христу, Вера с Надеждею и Любы всеславная.

И ныне. Богородичен. Всего ми зрака прием, иже зраком Божиим древле сыи, всего обнови, в Твоем чреве вселився Пречистая боголепно. Тем же Богородицу верно Тя славим.

Катавасия: Избавите от бед рабы своя, святии мученицы, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (трижды с поклонами).

Песнь 3. Ирмос

Един сведыи земных существо немощное, и милостивно в Не оболкся. Препояши мя свыше силою, воспевати Ти Святыи, церкви душевная неизреченныя славы Ти Человеколюбче.

Запев. Гласа послушавше Христова, зовуща к безсмертному и нестрастну житию, последоваша венценосицы девы и мученицы вопити Тебе: свят еси церкви душевная неизреченныя Ти славы Человеколюбче.

Запев. Крепость даровавыи Христос, ставшим на судищи мученически вам яко обещася. И богодухновенныя мудрости исполни, и светлы яви победоносныя мученицы, девьственою сияюща благодатию.

Запев. Притуписте ум вражии девы величаваго, и того гордыню низложисте. Великомудрено подвигшеся, и прежде хвалящагося потребити море, течением кровьным удавили есте.

Слава. Премудрости вышния Христовы богатно насытившеся избранныя, София и благоумныя дщери три, посрамиша мучащих шатание и ярость неудержимую, витующе божественая учения.

И ныне. Богородичен. Святым Святаго Христа породила еси, святая чистое селение, на святых почивающаго. Ему же вопием: свят еси церкви душевная пречистыя Ти славы Человеколюбче.

Катавасия.

Седален, глас 1-й.

София, честныя священныя леторасли, Вера и Надежда, и Любы явльшеся, мудрость объюродиша еллинскую, благодатию. Страдавше, и победоносны явившеся, венцы нетленными от всех Владыки увязошася.

Слава, и ныне. Богородичен. Молитвы Своих раб приими Богородице, и избави нас от всякия беды яко родила еси Христа Спаса, избавителя душам нашим.

Песнь 4. Ирмос

Гору Тя благодати Божия приосенену, прозорливыма Аввакум усмотрев очима. Ис Тебе изыдет Израилеви, провозглашаше Святаго на спасение наше и обновление.

Запев. Укрепльшеся Божиею благодатию, добропобедныя Вера, Любы, Надежда, мучителская прещения мужески посрамиша, и огнем всесожигаеми премудрыя, и невестнику Христу приводими.

Запев. Возмогше крестным всеоружием, и верою оградившеся, Вера, Любы и Надежда, мучения крепко раны стерпеша святии. Даже до крове к греху противльшеся.

Запев. Силою и любовию Троицы укрепляеми, Вера, Любы и Надежда, Троицы честней девы равночислении. Страстем лютость разжжения претерпеша, божествении и богоприятнии.

Запев. Посрамиша отроковицы младыя льстиваго, крестом ограждьшеся. Высокую гордыню на землю низвергоша светло, безумне хвалящася, вселенную всю прияти.

Слава. Свещи тричисленыя премудрости сияюща, Вера, Любы и Надежда, троическими просвещеньми яве укрепляеми, светло Церкви просвещают, к спасению нашему и заступлению.

И ныне. Богородичен. Святым святая Богородице препетая, чаяние языком, и спасение верным. Ис Тебе восия Избавитель, и Жизнодавец, и Господь на спасение нам поющим Тя. Катавасия.

Песнь 5. Ирмос

Просвещеи сиянием пришествия Твоего Христе, и освящь крестом си мирьския концы. Сердца просвети светом Твоего богоразумия правоверно хвалящих Тя.

Запев. Терпением разума раны подъимаху, премудрости божественыя глаголюще тайны. Держащаго посрамисте три девы богоносныя, верою и естеством связаеми.

Запев. Радуется прабаба, видящи побеждаема лукаваго, из Едема древле изгнавшаго ю, женами богомудрыми, Надеждею, Верою и Любовию, Софиины научении.

Слава. Ядовитаго мучителева ласкания избегше, и мученически волею козни претерпеша, честныя отроковицы Твоея Любы уязвльшеся Христе божественым рачением.

И ныне. Богородичен. Веселятся небесныя силы, видяще Тя, радуются с ними земленых соборища. Ибо прижитием совокупишася Твоим Дево Богородице. Тем Тя достойно славим. Катавасия.

Песнь 6. Ирмос

Обыде нас последняя бездна, и несть избавляяи, вменихомся яко овча на заколение. Спаси люди Своя Боже наш. Ты бо крепость немощным и исправление.

Запев. Радующеся в Твои Владыко пречистеи длани, возложиша надежды отроковицы. Троицы количеством и числом, почтены и похваляемы.

Запев. Светящеся девьственою добротою, и венцы мученическими украсишася. И славою сугубою ныне достойно увязошася, от Христа Жизнодавца и всещедрителя.

Слава. Приведена бывша Владыко в Церковь Твою всех Царю, девьственая сокровища честная, общитися Царствию Твоему. Ты бо тем и свет еси и веселие.

И ныне. Богородичен. Радуются о Тебе Дево препетая, рода нашего прадеди, Едема восприемше Тобою, его же преступлением погубиша. Ты бо Пречистая прежде рожества и по рожестве еси. Катавасия.

Слава, и ныне.

Кондак, глас 1-й.

Агницы словеснии, Агницу и Пастырю беседовати сподобистеся. Огневи лютому и мукам предани бысте, и явистеся ангелом равночестнии. Тем вси священную вашу память празднуем в веселии сердца девы богомудрыя.

Песнь 7. Ирмос

Тебе мысленую Богородице пещь, разсмотряем вернии. Яко же бо отроки спасе три превозношаемыи отцем Бог благословен еси.

Запев. Трисиянною единою благодатию озаряеми яве девы, бесовскую разрушиша тму. Света трисобствена богословяще и поюще: хвалимыи отцем Боже благословен еси.

Запев. На Небесех свещи имуще свещеносныя души, со ангелы весело ныне ликоствуете. Славы присносущныя наслаждающеся и поюще: восхваляемыи отцем Боже благословен еси.

Слава. Терпеливо яко отроцы противление показавше, огнь попраша мужески. Тех бо равночисленыи нрав стяжаша, тождемудрено богомудрыя, прехвалнаго поюще Бога и препрославленаго.

И ныне. Богородичен. Даеши Чистая оставление согрешением поющим Тя верно, избавляющи от напастей и всякого обстояния. Тебе бо ныне стяжахом прибежище богоневестная, яко воспетаго отцем Бога рукама носившая. Катавасия.

Песнь 8. Ирмос

В пещи дети Израиля, яко же в горниле, добротою благоверия чистее злата блещахуся глаголюще: благословите вся дела Господа, пойте и превозносите Его во веки.

Запев. Три девы богосветлыя, Вера, Надежда и Любы добротою благоверия, чистейше злата блещахуся, глаголюще: благословите вся дела Господа, пойте и превозносите Его во веки.

Запев. Сияющия, и светящияся страданием яве бывшия девы, вернии воспоем глаголюще: благословите вся дела Господа, пойте и превозносите Его во веки.

Слава. Исцелении потоки обильно нескудне и богатно, раки страстотерпиц источают всегда, верою зовущим: благословите вся дела Господа, пойте и превозносите Его во веки.

И ныне. Богородичен. Земля святая бысть Чистая, живоносныи клас рождьшая, нрисносущаго живота ходатая Христа. Ему же вси зовем: благословите вся дела Господа, пойте и превозносите Его во веки. Катавасия.

Песнь 9. Ирмос

Образ чистаго рожества Твоего, распалаему купину яви неопалиму. И ныне на нас напастей свирепеющу, угасити молимся пещь, да Тя Богородице непрестанно величаем.

Запев с поклоном. Светом трисиянным исполняеми, и сияния божественаго ныне насыщающеся, тезоименитыя добродетелем, и тождеименны Любве, Надежди и Веры, надеждею и любовию нас и верою утвердите.

Запев. Да вышняя крепость ныне укротит одержащаго волнения еретическаго, о страстотерпицы непобедимии, и подаст верным соединение. Просите молим непрестанно добродевьствении.

Слава. Нощь жития всемудрыя прешедше, день постигосте невечернии. Мученически веселящеся, и девьствено хвалящеся благодатию, и Божия Царьствия нетленнаго сподобляеми.

И ныне. Богородичен. О како Девая роди присносущное Слово и ипостасно, сияния Отча сличия, нашего благодателя и Господа, из Нея воплощьшася, Его же достойно величаем. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святых мучениц Софии и чад ея Веры, Любве и Надежди, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.